Санахын зовлон..,

Зүг бүрт сүлжилдэх хаврын дуучин шувууд, зөндөө удаан хүлээсэн учрал шиг тогтож ядан нисэлдэнэ. Зүгээр л ийм байхыг хүссэн ч юмуу, зүгээр ч үгүй сэтгэл шиг минь уймраад л байх шиг.., Сонссон, сонсоогүй элдэв хэлээр шулнаналдан хөөрөлдөх нь амраг шиг минь ч юм шиг, алагхан үр шиг минь ч юм шиг.., Хавар бүрийн шувуудын дуунаар сэргэдэг дэлхий ертөнц аанай л өнгө засан гэрэлтэнэ..,

            Үзэсгэлэнт байгалийг мэдрэн алхах хаврын улиралд би хамгаас илүү хайртай. Зөн совин минь хавар ирснийг гэрчлэх мэт далдаас хайрын их хүчээр халуу төөнүүлнэ. Өчигдөрхөн л хэзээ амилах нь үл мэдэгдэх бараан дэлхий, үзэмж төгс цэцэгс дээр өнгө тансаг эрвээхэйгээр гоёжээ. Зүрх сэтгэл минь бас л гоёлоо хайн, саяхан л шатаан ирж асан анхны хайрын дурсамжуудыг шуурга шиг өдөөн сануулна.

            Миний л ертөнцөд хавар ямар их үнэтэй гэдгийг жил бүр мэдэрнэ. Хайрын нарсан төгөл минь цэцэглэн буй энэ л улиралд бүхнийг умартан чиний л зүг тэмүүлэх нь сэтгэлийн минь хязгааргүй эрч хүч гэлтэй. Би чамайгаа санахын зовлонг "жаргал" гэж өөртөө үглэсээр хичнээн ч удав.., Яг үнэндээ жаргал бус зовлон гэдгийг өөрөөсөө нуух ямар ч хүсэл алга. Уулзах мөч ямархан байхыг жижигхэн тархи минь төсөөлж ч чадахгүй нь хайр минь..,

            Зүүдний ертөнц дэндүү цөхрөөд, нэг л адилхан хэмнэл, чиний үлдээсэн дурсамжыг бүгдийг зүүдэлж дуусчихаад чимээгүйхэн хүлээгээд байнаа хайрт минь. Яг үнэндээ, зөөлөн бороонд тэвэрч зогсохыг, зөв буруугүй яриад л байхыг, зүгээр дэргэд минь л байгаасай гэж зүрх сэтгэл минь хүсээд байнаа чамайг.., Учралын сайхан, уруулын чинь амт үгүйлэгдээд байнаа хань минь..,